Водата е целосно безбедна, децата се позитивни на Норовирус. Институтот соопшти дека физичко-хемиската анализа и микробиолошката анализа на водата земена од ОУ Димо Хаџи Димов се во рамките на референтните вредности.
-Тешки метали во мострите од водата не се пронајдени, велат оттаму.
Изворот на труењето на основци, меѓу кои и синот на премиерот Мицкоски, во ова училиште во Карпош е кујната, кадешто се пронајдени фекални бактерии.
„Како што претходно известивме за резултатите од мостри од храна и работни површини од истоименото училиште, најдени се фекални бактерии Enterobacteriaceа во мусаката и на неколку површини од кујната и училиштето кои укажуваат на нехигиена во училиштето и кујната. Од добиените 7 примероци на биолошки материјал кои ги имаме примено во Институтот за јавно здравје од деца кои јавиле симптоми, 6 се позитивни на Norovirus“, соопштија од ИЈЗ.
Екипите на Институтот остануваат на работа и за време на викендот, а резултатите за мострите од другите девет училишта во Карпош ќе бидат објавени во понеделник.
„ИЈЗ е во постојана комуникација со другите надлежни институции и за сите дополнителни информации ќе ја информира јавноста“, се додава во соопштението.