Три момчиња загинаа на плажа во близина на Тарагона во Каталонија, Шпанија, каде што беше подигнато жолто знаме поради високи бранови, соопштија властите во неделата.
Несреќата се случила во петокот кога група од шест момчиња скокнале во морето директно од карпите. Три од нив успеале сами да испливаат и да стигнат до брегот, додека преостанатите три момчиња биле извлечени од страна на спасувачките екипи.
И покрај итните обиди за реанимација на самото место, едно 12-годишно момче починало на плажата. Другите две деца, на возраст од 13 години, во критична состојба биле пренесени во болница, каде што подоцна починале, потврдија од регионалните служби за итни случаи.
Поради сериозноста на настанот, градската влада на Тарагона веднаш прогласи тридневна жалост во општината.
Претседателот на Каталонија, Салвадор Иља, изјавил дека е „длабоко тажен“. „Во овој момент нема зборови за толку голема болка“, рекол тој на социјалната мрежа X.
Властите упатија итен апел до јавноста и до туристите да ги почитуваат предупредувањата за безбедност на плажите.
„Не треба да преземаме непотребни ризици. Под никакви околности не треба да скокаме од карпи“, изјавил градоначалникот на Тарагона, Рубен Винуалес.