Шест лица починаа, а десетици се хоспитализирани низ САД откако консумирале готови јадења со тестенини контаминирани со бактерии Listeria monocytogenes, соопштија властите, кои издадоа итно предупредување до граѓаните да ги проверат своите фрижидери.
Американската администрација за храна и лекови (FDA) го прошири повлекувањето на производите на Nate’s Fine Foods, кои се продаваат во големите синџири како Trader Joe’s, Sprouts Farmers Market, Kroger и Walmart, објави Unilad.
Според најновите податоци на CDC, бројот на заразени лица се искачи на 27 лица во 18 држави. Од 26 лица за кои се познати деталите, 25 биле хоспитализирани. Меѓу заразените имало и една бремена жена чија инфекција довела до губење на фетусот.
Во соопштението на компанијата се наведува:
„Nate’s Fine Foods е посветен на највисоките стандарди за безбедност на храната и благосостојбата на нашите потрошувачи. Како превентивна мерка, доброволно повлекуваме одредени производи откако бевме известени за потенцијална врска со епидемија на Listeria monocytogenes во повеќе држави.“
Првично, повлекувањето се однесуваше на ограничен број производи, но подоцна беше проширено и опфати седум различни вкусови на готови тестенини.
Бактеријата Listeria monocytogenes се шири преку контаминирана храна и може да предизвика симптоми од благи, слични на грип, до тешки состојби како менингитис. CDC предупредува дека најголем ризик имаат бремените жени, новороденчињата, постарите лица и лицата со ослабен имунолошки систем.
Меѓу поблагите симптоми се треска, болки во мускулите, главоболка, гадење, повраќање и дијареа. Тешките симптоми може да вклучуваат вкочанет врат, конфузија, губење на рамнотежа и напади.