Патниците на летот на американската авиокомпанија „Делта ер лајнс“ на релација Њујорк – Тел Авив утрово беа евакуирани по слетувањето на меѓународниот аеродром „Бен Гурион“ во Израел, откако безбедносните служби добиле анонимна дојава за поставена експлозивна направа.
Како што пренесуваат странските медиуми, вклучително и британскиот „Мирор“, надлежните веднаш ги активирале безбедносните протоколи поради сомневање дека во леталото има бомба. Патниците биле евакуирани во терминалната зграда, додека авионот бил преместен во изолиран дел од аеродромот каде што специјализирани екипи извршиле детална проверка.
Според израелскиот весник „Џерусалим пост“, првичните проценки на службите укажувале на лажна дојава, што се потврдило по прегледот. Порусолошките проверки покажале дека не е пронајдена експлозивна направа ниту сомнителен предмет, објави порталот „Јнет“.
Израелската управа за аеродроми потврди дека операцијата е завршена и сообраќајот е нормализиран.
„Инцидентот е завршен без никакви необични наоди. Сообраќајот се врати во нормала“, соопштиле од израелската управа за аеродроми.
Засега нема информации за идентитетот на лицето кое ја испратило анонимната пријава, ниту за покрената истрага.