Познатиот американски актер Џејмс Хенди (81), препознатлив по своите улоги во култните филмови како „Џуманџи“ и „Топ Ган: Маверик“, е трагично убиен пред својот дом во населбата Тарзана, северозападно од Лос Анџелес.
Според официјалните информации од полицијата, инцидентот се случил во средата наутро кога итните служби пронашле маж во несвесна состојба со убодна рана во пределот на градите. Актерот веднаш бил пренесен во болница, каде што набрзо била констатирана смрт.
Шокантен повик до брзата помош: „Го убив човекот на гревот“
Она што ја шокираше јавноста е фактот дека самиот убиец се јавил на телефонскиот број за итни случаи (911) за да го пријави делото. Во аудиоснимката која беше објавена од страна на надлежните служби, напаѓачот ладнокрвно изјавил:
„Јас сум синот на човекот, штотуку го убив човекот на гревот.“ – се слуша во повикот упатен до 911.
Полицијата веднаш ја блокирала целата населба и по детална потрага куќа по куќа го уапсила осомничениот. Станува збор за 44-годишниот Мајкл Гледхил, кој живеел во истиот дом и е син на долгогодишната девојка на убиениот актер. Напаѓачот веднаш признал дека тој е сторителот, а судот му одреди кауција од два милиони долари.
Проштални зборови од неговиот тим
Потврда за трагичниот настан пристигна и од официјалниот застапник на актерот, кој со голема тага се обрати до јавноста:
„Со огромна тага можам да потврдам дека господинот кој беше нападнат и убиен во средата во Тарзана е актерот Џејмс Хенди.“ – изјави неговата агентка Пам Елис-Евенас.
Хенди зад себе остави богата кариера која траеше речиси 50 години, со појавувања во над 150 филмски и телевизиски проекти, меѓу кои и популарните серии „Њујоршки сини“, „Досиеја Икс“ i „Алијас“.