Поранешната прва дама и државен секретар на САД, Хилари Клинтон, денеска се појави пред Надзорниот комитет на Претставничкиот дом во Вашингтон за да даде исказ во врска со мрежата на Џефри Епштајн. Иако Клинтон инсистираше сведочењето да биде јавно, републиканскиот претседател на комитетот, Џејмс Комер, донесе одлука сослушувањето да се одржи зад затворени врати.
„Никогаш не сум го сретнала Епштајн“
Клинтон ги објави своите воведни зборови на социјалните мрежи уште пред почетокот, децидно негирајќи каква било поврзаност со озлогласениот финансиер.
„Немам сознанија за нивните криминални активности. Не се сеќавам дека некогаш сум го сретнала г-дин Епштајн. Никогаш не сум летала со неговиот авион, ниту сум ги посетила неговите острови, домови или канцеларии. Како и секој пристоен човек, бев ужаснат од неговите злосторства“, изјави Клинтон под заклетва.
Таа го искористи моментот да потсети на нејзината долгогодишна борба против трговијата со луѓе ширум светот, споменувајќи потресни приказни од Југоисточна Азија и Источна Европа.
Директен напад врз Доналд Трамп
Највпечатливиот дел од сведочењето беше моментот кога Клинтон ја префрли одговорноста на актуелниот американски претседател. Таа побара од Комитетот да престане да го испрашува неа и да го повика Доналд Трамп под заклетва.
„Доколку овој Комитет е сериозен, нема да бара одговори преку новинари, туку ќе го праша претседателот директно, под заклетва, за десетиците илјади пати кога неговото име се појавува во досиејата на Епштајн“, порача таа.
Скандал во живо: Лорен Боберт ги прекрши правилата
Сведочењето беше накратко прекинато поради инцидент кој предизвика бура на социјалните мрежи. Републиканската конгресменка Лорен Боберт тајно ја фотографирала Клинтон за време на сослушувањето (што е строго забрането) и ја испратила сликата на инфлуенсерот Бени Џонсон, кој веднаш ја објави на „X“.
Боберт призна дека таа е автор на фотографијата, но дрско изјави дека „не направила ништо лошо“, и покрај тоа што ги прекршила протоколите за доверливост на Комитетот.