Илјадници жители во романскиот главен град Букурешт се соочуваат со прекин во снабдувањето со топла вода, откако силна експлозија доцна во понеделникот предизвика голем пожар во термоцентралата „CET București Vest“.
Инцидентот бил видлив од далечина од неколку километри, а огнот ја зафатил инфраструктурата која ги опслужува секторите 1, 5 и 6. Според првичните информации, повеќе од 3.000 станбени блокови останаа без топла вода како резултат на оштетувањата на капацитетите на централата.
Екипите на противпожарната служба интервенирале брзо, при што пожарот бил изгаснат по околу три часа интензивна борба со пламените јазици. И покрај тоа што огнот е ставен под контрола, пожарникарските екипи утрово останаа на лице место за да ја следат состојбата и да го извршат неопходното разладување на погоденото подрачје со цел да се спречи повторно активирање.
Властите потврдија дека причина за пожарот се трансформаторските единици во кои дошло до експлозија.