Технички дефект на системот за контрола на летовите предизвика доцнења и откажувања на летовите ширум Италија.
Италијанската управа за авиосообраќај (ЕНАВ) соопшти дека дефектот не е злонамерно предизвикан.
Од ЕНАВ посочија и дека вовеле привремени ограничувања на капацитетите на авиосообраќај откако синоќа беа регистрирани аномалии на мрежата за пренесување на податоци, која ги поддржува услугите на контролата на лет.
Поради настанатите проблеми реагираа и аеродромските оператори во земјата. Компанијата АДР, која управува со римските аеродроми, соопшти дека „поради техничките проблеми во системот за контрола на летот на национално ниво можно е доцнење и откажување на летовите“. Слично соопштение објави и компанијата СЕА, која управува со аеродромите во Милано.
Надлежните интензивно работат на целосно нормализирање на состојбата.
– Изворот на проблемот е идентификуван, а во тек се напори за повторно воспоставување на системот, се наведува во соопштението на ЕНАВ.