Десетици илјади граѓани го исполнија Плоштадот на независноста во Подгорица за да го гледаат настапот на порториканската ѕвезда во живо, објавија црногорските медиуми. Не само што плоштадот беше исполнет до крај, туку и околните улици и ресторани беа преполни со посетители.
Како вовед во музичкиот спектакл, најпрво настапија домашни изведувачи кои ја загреаа атмосферата.
Тамара Живковиќ ја отвори церемонијата со песната „Нова зора“, а публиката потоа ја забавуваа Милена Вучиќ и Ненад Кнежевиќ Кнез.
Очекувањето го достигна својот врв кога Рики Мартин излезе на сцената, поздравен со овации и громогласен аплауз од воодушевената публика.
Ѕвездата на вечерта веднаш им се обрати на присутните, честитајќи им го Денот на независноста.
„Ви благодарам многу. Ова ќе биде многу убава вечер. Ќе биде многу убава и можам да го видам тоа во вашите очи, насмевки и енергија. Вечерва ќе биде посебна во Црна Гора. Дали сте спремни да се забавувате, Црна Гора?“, вети светската музичка ѕвезда.
Тој го започна својот настап со легендарниот хит „Марија“, а на самиот почеток ги изведе и песните „She Bangs“ и „Private Emotion“, терајќи ја публиката да танцува од првиот такт.
За жал, одличната атмосфера накратко беше нарушена кога во публиката беше фрлен солзавец, што предизвика моментален прекин на концертот.
Сепак, по брзата реакција на службите, концертот набрзо продолжи. И покрај краткиот инцидент, забавата во Подгорица продолжи длабоко во ноќта, а публиката пееше и танцуваше со Мартин.