Службата за борба против високотехнолошки криминал при српското МУП упати итно предупредување до граѓаните поради безбедносен инцидент на платформата за резервација на сместување „Booking.com“. Иако официјалните податоци укажуваат дека платежните картички не биле директно компромитирани, направениот упад овозможил неовластен пристап до личните податоци на корисниците, што создава висок ризик од целни измами.
Според полицијата, хакерите дошле до имиња, контакт информации и детали за резервациите на патниците. Овие информации се „златна вредност“ за сајбер-криминалците, бидејќи им овозможуваат да креираат многу убедливи пораки за фишинг напади, претставувајќи се како сместувачки капацитети или самата платформа „Букинг“.
На што треба да внимаваат граѓаните? Најчестото сценарио на измама вклучува испраќање пораки во кои, под изговор за „верификација на картичка“ или „итно плаќање“, од корисниците се бара да достават податоци за своите платежни картички. Надлежните укажуваат дека криминалците користат вистински податоци од вашата резервација, што ги прави пораките исклучително веродостојни.
Инструкции за заштита: Од МУП апелираат граѓаните кои ја користеле оваа платформа да бидат крајно претпазливи:
- Следете ги трансакциите: Внимателно проверувајте ги изводите од платежните картички.
- Блокирајте при сомнеж: Доколку забележите неовластена активност, веднаш контактирајте ја банката и блокирајте ја картичката.
- Лимити: Размислете за привремено намалување на дневните лимити за онлајн трошење.
- Никогаш не споделувајте податоци: Не доставувајте детали за картичката преку е-пошта, СМС или апликации за пораки.