Француското Министерство за внатрешни работи неколку дена било мета на сериозен хакерски напад, при кој е остварен неовластен пристап до службените електронски пошти на дел од вработените, како и до чувствителни полициски бази на податоци.
Министерот за внатрешни работи, Лоран Нуњез, потврди дека е регистриран сајбер-напад и дека хакерите успеале да пристапат до „одредени професионални е-поштенски сандачиња“, што им овозможило увид во повеќе клучни полициски системи, меѓу кои Системот за обработка на кривични евиденции и Регистарот на барани лица.
„Сè уште не го знаеме опсегот на компромитација. До денеска можеби се отстранети неколку десетици датотеки од системот“, изјави Нуњез.
Тој додаде дека во овој момент не може со сигурност да се потврди дали евентуално протечените информации можат да ги загрозат тековните полициски истраги. Според министерот, одговорност за инцидентот имаат и поединечни вработени кои не ги почитувале пропишаните безбедносни процедури.