Сообраќајот на државните патишта се одвива непречено, по суви коловози, информираат од Авто-мото сојузот на Македонија (АМСМ).
Интензитетот на сообраќај на патните правци надвор од градските средини е зголемен.
Поради зголемена фреквенција на возила, на граничниот премин Табановце времето на чекање за влез во државата е околу 30 минути.
Исто толку време, околу 30 минути, се чека и на граничниот премин Богородица за излез од државата.
На останатите гранични премини од македонска страна, нема подолги задржувања за влез и излез од државата, додаваат од АМСМ.
Од АМСМ препорачуваат прилагодена брзина на движење, почитување на поставената сообраќајна сигнализација и внимателно управување со возилата.
Ова посебно се однесува на патиштата низ котлините, речните долини и клисурите, каде што има можност од појава на одрони.
Како поризични делници се издвојуваат Катланово – Велес, Маврово – Дебар – Струга, Виница – Берово и Кочани – Делчево.