Голема концентрација на прашина од Африка денеска повторно ја зафаќа Грција, а според метеоролошките прогнози, оваа појава ќе трае најмалку до четврток. Грчките медиуми, повикувајќи се на весникот „Ефимерида тон синдактон“, пренесуваат дека облаците прашина веќе се видливи во поголем дел од земјата.
Овој феномен, кој е вообичаен за регионот поради близината со Африка, носи сериозни ризици по здравјето и значително го влошува квалитетот на воздухот.
„Само 14 проценти од градовите во светот ги исполнуваат препораките на СЗО за концентрација на ПМ 2,5 честички, а Грција бележи алармантен пораст од 30 отсто во последната година“, стои во анализата на платформата IQAir.
Најкритично е во центарот на Атина, каде се измерени 14,7 микрограми на кубен метар, што е речиси трипати над безбедната граница пропишана од Светската здравствена организација.