Армијата на Република Северна Македонија денеска на градскиот стадион во Штип ќе организира презентација на воена опрема, возила и способности на армиските единици, со цел граѓаните одблиску да се запознаат со нивната работа и подготвеност.
Настанот се одржува по успешно реализираната вежба „Блесок 26“, во чии рамки беше извршено оценување на борбената готовност на Лесната пешадиска баталјонска група.
Според најавите од Армијата, посетителите ќе имаат можност да разгледаат дел од вооружувањето, воената опрема и возилата, како и да проследат повеќе показни вежби и демонстрации.
Предвидени се алпинистичка вежба на Извидувачко-разузнавачкиот баталјон, демонстрација со службени кучиња, приказ на боречки вештини од Баталјонот на специјални сили, егзерцир на Баталјонот за почести, како и презентација на медицинска опрема и техники за укажување прва помош од Военомедицинскиот центар.
На настанот ќе присуствува претседателката и врховен командант на Вооружените сили Гордана Сиљановска-Давкова, придружувана од началникот на Генералштабот на Армијата, генерал-мајор Сашко Лафчиски.
Во рамки на презентацијата ќе настапи и Воениот оркестар на Армијата, а граѓаните ќе можат да се информираат и за можностите што ги нуди Воената академија „Генерал Михаило Апостолски“ – Скопје.