Автобус на линијата 4116, во кој се превезувале четири лица, утринава околу 09:30 часот излетал од коловозот и завршил во реката Сена. Несреќата се случила во општината Живизи, при што возилото со себе повлекло и паркиран автомобил.
Зад воланот била жена, возач-приправник, која ја проверувала линијата во присуство на инструктор и двајца патници. Првичните сомнежи се дека дошло до грешка при управувањето со контролите на возилото.
Очевидци и минувачи биле првите кои притрчале на помош додека не пристигнат спасувачките служби. На терен биле испратени 16 противпожарни возила, 60 полицајци и нуркачки екипи.
Градоначалничката на Живиси, Ламија Бенсарса Реда, изрази шокираност од настанот кој го парализираше сообраќајот во овој дел на градот.
„Ова е прв пат да видам нешто вакво. Мислам дека е најлошиот ден во мојот живот. За среќа, нема жртви благодарение на брзата реакција на полицијата и спасувачките служби“, изјави таа.
Поради инцидентот, неколку автобуски линии се пренасочени, а станицата Живиси е надвор од функција. Властите веќе наложија итна внатрешна истрага кај операторот на јавниот превоз за да се утврдат точните причини за падот во реката.