Во Скопје денеска ќе се одржи конференцијата „Ран почеток, трајни придобивки – градинка за секое дете“, во организација на Министерството за социјална политика, демографија и млади и УНИЦЕФ.
Настанот е посветен на унапредување на пристапот до предучилишно образование и грижа, преку претставување на анализи и препораки за нови модели на финансирање и развој на услугите. Целта е да се поттикне поширока дебата за можностите за зголемување на опфатот на децата, со посебен акцент на најранливите категории.
Воведни обраќања ќе имаат министерот за социјална политика, демографија и млади и претставничката на УНИЦЕФ во земјава, по што ќе бидат презентирани анализите „Првите години се важни“ и „Патеки кон инклузија“. Во рамки на конференцијата ќе се одржат и панел-дискусии посветени на улогата на јавниот и приватниот сектор во развојот на предучилишното образование, како и на можностите за поголема вклученост на децата Роми и децата со попреченост.
Според организаторите, пристапот до квалитетно предучилишно образование останува предизвик, а значителен број деца во земјата сè уште не се опфатени со вакви услуги. Оттаму посочуваат дека се потребни нови решенија и партнерства за да се обезбеди еднаков старт и подобри можности за развој на секое дете.