Повеќекратните лабораториски и теренски анализи потврдија дека водата од градскиот водовод во Гостивар е целосно прочистена од фекални бактерии и од денеска може официјално да се користи за сите домашни технички потреби. Ова на денешната прес-конференција го соопшти министерот за внатрешни работи Панче Тошковски, кој раководи со Управувачкиот комитет за координација и управување со системот за управување со кризи.
Според официјалните наоди од експертските тимови, граѓаните на Гостивар сега можат да ја користат водата за одржување хигиена и за бањање, но таа сè уште не е безбедна за пиење и за подготовка на храна.
Поради оваа причина, надлежните служби ќе продолжат со континуирана дистрибуција на флаширана питка вода за населението до нејзино целосно нормализирање.
Министерот Тошковски од прес-конференцијата упати порака за благодарност до граѓаните, но и сериозно предупредување до сите одговорни чинители:
„По повеќекратни испитувања, имаме добиено потврда од страна на експертите дека истата ќе може да се користи како техничка вода, за бањање и сите потреби во рамки на домаќинството, но не и за пиење – ниту пак за подготвање на храна“, кажа Тошковски на прес-конференција денеска.
Тој дополнително ги истакна преземените мерки за дезинфекција и идната одговорност на институциите:
„Им благодарам на гостиварци за разбирањето, како и на експертите кои ги преземаа сите активности во делот на хиперхлорирање и воспоставување на апаратура, за да дојдеме до фаза да имаме техничка вода, а се надевам за брзо, ќе известиме точно кога, дека ќе дојдеме и до вода за пиење. Се надевам дека за сите одговорни ова ќе биде за памет, и еднаш засекогаш понатаму ќе постапуваат максимално професионално и во рамки на нивните законски утврдени надлежности во делот на контрола на квалитетот на водата, заради тоа што со здравјето и безбедноста на граѓаните играње нема“, рече Тошковски.
Експертите од скопски „Водовод“: Нема колиформни бактерии три дена по ред!
Детални технички објаснувања за квалитетот на водата на прес-конференцијата изнесе Емилија Аневска од ЈП „Водовод и канализација“ – Скопје. Таа посочи дека последните земени примероци од крајните потрошувачи во Гостивар покажале позитивни параметри по спроведеното хиперхлорирање.
Аневска ги образложи лабораториските резултати кои беа доставени до Агенцијата за храна и ветеринарство:
„Кај сите примероци, три дена последователно, е забележано отсуство на колиформни бактерии и поради тоа што е извршено хлорирање со поголема концентрација, кај примероците не е регистрирано присуство на трихалометани над дозволени граници. Резултатите се доставени на Кризниот штаб и на Агенцијата за храна и ветеринарство како надлежен орган“, рече Аневска.
Се решава проблемот со дезинфекцијата во локалното претпријатие
Претставничката од скопски „Водовод“ алармираше дека во меѓувреме ќе се интензивираат тестирањата на повеќе мерни точки, но подвлече дека локалното јавно комунално претпријатие во Гостивар системски се соочува со дефекти во процесот на дезинфекција.
Таа појасни какви чекори следуваат пред да се даде дозвола за пиење:
„Јавното претпријатие во Гостивар генерално се соочува со проблем во процесот на вршење на дезинфекција. Ќе се обидеме во следните неколку денови да се реши и тој дополнителен проблем. Кога дезинфекцијата ќе биде континуирана и нема да има отстапување од нормалните вредности за да се добие безбедна вода, прво ќе го известиме Кризниот штаб, а потоа и граѓаните“, посочи таа.
Инаку, процесот на санација започна откако Управувачкиот комитет утврди микробиолошка неисправност, по што експертските екипи веднаш пристапија кон комплетно чистење на главната каптажа и инсталирање на нов автоматизиран систем за хлорирање според сите законски стандарди.