Градоначалникот на Општина Центар, Горан Герасимовски, преку објава на социјалните мрежи информираше дека е избран за нов потпретседател на СДСМ, нагласувајќи дека ја прифаќа функцијата со големо чувство на одговорност.
Тој посочи дека доаѓа од локалната политика и секојдневните средби со граѓаните, истакнувајќи дека политиката се прави меѓу луѓето. Герасимовски порача дека СДСМ мора да се обедини околу заедничките принципи и социјалдемократските вредности.
„Не мора секогаш да мислиме исто. Не мора секогаш да се согласуваме. Но мора да знаеме што нè спојува. А тоа се принципите, спас на државата, одбрана на социјалдемократијата и борба за достоинствен живот на граѓаните. Со конкретни мерки, затоа што имаме и капацитет и квалитетни кадри и храбри поддржувачи.“
Новиот потпретседател нагласи дека различното мислење треба да ја прави партијата посилна, а довербата се гради преку работа на терен, човек со човек и општина по општина.
„Ве уверувам и Ви ветувам, дека победата во Центар, ќе ја пресликам и промовирам и во партијата. Тоа ќе биде мојот скромен придонес, бидејќи и јас и членовите на Центар, покажавме и докажавме, дека само храбро и со срце, дојдовме до резултати“, истакна Герасимовски.
На крајот, тој повика на сплотеност без поделби и суети, потсетувајќи дека силата на СДСМ секогаш била во луѓето.