Франција се соочува со нова политичка криза по оставката на премиерот Себастијан Лекорну, само 27 дена по неговото назначување. Претседателот Емануел Макрон му наложи на Лекорну да спроведе уште два дена преговори за дефинирање мерки за стабилност, иако шансите за успех се минимални.
Лидерот на Националниот собир, Марин Ле Пен, побара од Макрон или да поднесе оставка или да го распушти парламентот и да распише нови избори. Анкетите покажуваат дека нејзината партија би остварила рекорден резултат, но без апсолутно мнозинство.
Левицата, пак, се противи на избори и бара формирање левичарска влада која би ја обединила земјата околу социјална и еколошка правда. Аналитичарите предупредуваат дека Франција влегува во период на институционална блокада, а Макрон сè повеќе се соочува со критики и од сопствените редови.