Општина Гази Баба се приклучи на големата еколошка акција за чистење и уредување на јавните површини покрената од Градот Скопје, со активно учество на општинските служби, јавните претпријатија и училиштата.
Рано утрото, вработените од ЈКП „Гази Баба“ започнаа со чистење на јавните површини во населбата Автокоманда. Истовремено, општинската администрација работеше на уредување на пешачките патеки долж булеварот „Александар Македонски“, додека еколошките секции од основните училишта со голем ентузијазам ги чистеа училишните дворови.
Градоначалникот Бобан Стефковски истакна дека ваквите иницијативи имаат за цел подигнување на свеста кај граѓаните:
– Ова не е само акција за чистење – ова е порака дека сите заедно имаме одговорност да се грижиме за просторот во кој живееме. Пораката е јасна: да ги чуваме чисти јавните површини, да не фрламе отпад и да бидеме пример за одговорно однесување кон животната средина.
Од Општината најавија дека овие акции ќе прераснат во редовна пракса и ќе се реализираат секоја втора среда во месецот, со соработка на институциите и граѓаните.
