Москва, Вашингтон и Пекинг започнаа со подготовките за одржување на еден од најзначајните меѓународни состаноци – трилатерален самит меѓу рускиот претседател Владимир Путин, американскиот претседател Доналд Трамп и кинескиот претседател Си Џинпинг, изјави Јуриј Ушаков, помошник на рускиот претседател за надворешна политика.
Според зборовите на Ушаков, кинеските претставници сериозно пристапиле кон организациските подготовки, а сите три страни начелно искажале подготвеност за одржување на овој историски формат.
„Можам со сигурност да кажам дека Москва, Пекинг и вашингтонската администрација се во принцип подготвени да ја одржат средбата и дека подготовките веќе се започнати“, изјави Ушаков во интервју за медиумите.
Како што е најавено, клучниот момент за дефинирање на деталите се очекува на претстојниот ноемвриски самит на Азиско-пацифичката економска соработка (АПЕК) во Шенжен, Кина, кој ќе се одржи на 18 и 19 ноември. По овој состанок треба да се разјасни и прашањето околу евентуалното присуство на рускиот претседател на самитот на Групата 20 (Г20) во декември во Мајами, САД, за кој Москва веќе има добиено покана. Иако сè уште нема конкретни разговори за посебна билатерална средба меѓу Путин и Трамп во рамките на АПЕК, надлежните не ја исклучуваат можноста за одвоени разговори покрај трилатералните средби и протоколарните настани.