Во багажот на двајца патници кои од Каиро преку Атина пристигнале на аеродромот на грчкиот остров Миконос биле пронајдени и запленети 120.000 цигари, односно 6.000 кутии, како и 4,5 килограми тутун за наргиле спакуван во пакувања од по 50 грама, соопштија од Независната управа за јавни приходи на Грција (ААДЕ).
Како што посочија оттаму, насочените контроли на инспекторите на аеродромот резултирале со заплена на голема количина шверцувани тутунски производи, „спречувајќи нивно незаконско пласирање на европскиот пазар“.
Акцијата следела по добиени информации и спроведена анализа на ризик, по што цариниците ги запреле патниците за контрола.
-Вкупниот износ на неплатени царини и даноци што се однесуваат на запленетите производи изнесува 25.575,57 евра. Двајцата патници беа уапсени и се задржани, со цел да бидат изведени пред надлежниот обвинител, соопштија од ААДЕ.