Нов пожар избувна во област со ниска вегетација во местото Дридза, во општината Коропи, лоцирана јужно од Атина.
Поради брзото ширење на огнот, грчките власти веднаш спроведоа голема мобилизација на противпожарните сили.
Според пишувањата на весникот „Катимерини“, пожарот бил пријавен денеска околу 13:45 часот.
По пријавата, надлежните служби веднаш испратиле предупредување до сите жители во поширокото загрозено подрачје со цел превенција и нивна безбедност.
Во гаснењето на пламенот учествуваат 52 пожарникари, три специјализирани тимови и 14 противпожарни возила.
Од воздух во акцијата се вклучени два авиона и четири хеликоптери, од кои еден има задача да ја координира целата операција од воздух.
Во поддршка на интервенцијата се вклучила и општината Коропи, која на терен испратила сопствени цистерни со вода.
На местото на пожарот веќе е испратен и специјален истражувачки тим, кој треба да ги утврди причините за избувнувањето на огнот.