Градоначалникот на Скопје, Орце Ѓорѓиевски, во вечерашното гостување во емисијата „Тема на денот“ на телевизија Сител, најави дека во наредните десетина дена започнуваат градежните активности за поврзување на подземната сообраќајница под „Лимак“ со булеварот „Македонија“, како и изградбата на кружни текови на влезот и излезот од оваа клучна сообраќајница за главниот град.
„Во наредните десетина дена започнуваме со втората фаза, односно со изградба на тунелите за поврзување со подземната сообраќајница под ‘Лимак’, во правец од Центар кон Кисела Вода“, истакна градоначалникот Ѓорѓиевски.
Пуштањето во употреба на подземниот булевар „Македонија“ под „Лимак“ е еден од врвните приоритети на градоначалникот Ѓорѓиевски и претставува капитален проект од исклучително значење за Скопје.
Станува збор за инвестиција која ќе донесе вистински пресврт во централното градско подрачје, ќе придонесе за значително растоварување на сообраќајниот метеж и ќе овозможи побрзо, побезбедно и пофункционално движење низ центарот на градот.
Градот Скопје во изминатиот период, со интензивна работа, ја комплетираше првата фаза од овој проект, која опфати проширување, адаптирање и подготовка на улиците што ќе ја примат очекуваната зголемена фреквенција на сообраќај кон подземната сообраќајница.
Со забрзано темпо оваа пролет се работеше на булеварот „Борис Трајковски“, кај Рампа, на улиците „11 Октомври“ и „Пролет“, како и на булеварот „Македонија“, кој се поврзува со следните фази од оваа траса.
Со реализацијата на овој проект, Скопје добива современо сообраќајно решение кое ќе ја подобри мобилноста, ќе го намали притисокот врз централните улици и ќе овозможи подобра поврзаност.
Во емисијата беа отворени и повеќе други теми од интерес на граѓаните, меѓу кои унапредувањето на јавниот превоз, реализацијата на градските капитални градежни проекти, справувањето со дивоградбите, реконструкцијата на фонтаните, подобрувањето на комуналната хигиена и одржувањето на градската атмосферска канализација.
Градот Скопје продолжува со силна динамика во реализацијата на капиталните проекти што значат подобра инфраструктура, подобра поврзаност и пофункционален град за сите скопјани. Паралелно се работи и на клучката „Момин Поток“, булеварот „Борис Трајковски“ од Пинтија кон Драчево, мостот на „Љубљанска“ за поврзување на Бардовци со Карпош, како и мостот „Генерал Михајло Апостолски“, кој овозможува директно поврзување на Аеродром со Гази Баба. Станува збор за проекти кои ја менуваат сообраќајната слика на Скопје и создаваат основа за побрз, побезбеден и помодерен град.