Градоначалникот на ГрадСкопје Орце Ѓорѓиевски, реагираше на обвинувањата од опозициската СДСМ во врска со третманите против комарци и појавата на западно-нилска треска.
Ѓорѓиевски посочува дека по темата со скопската вода, опозицијата повторно се обидува една сериозна здравствена тема да ја претвори во дневнополитичка пресметка и да создаде непотребен страв кај граѓаните.
„Вообичаено не реагирам на секоја прес-конференција на опозицијата. Но очигледно дека новата хистерија на СДС, по таа со скопската вода, е оваа за комарците. Без проблем, јас и за ова сум спремен да дебатирам“, изјави Ѓорѓиевски.
Тој потенцира дека западно-нилската треска не е нов вирус и циркулира во повеќе европски земји, како и во непосредното соседство, поради што на граѓаните им се должат информации и превенција, а не политичка хистерија. Во однос на префрлањето на вината за тоа кој и кога прскал, тој направи споредба со периодот кога со Градот раководеше СДСМ.
„Во 2018 година, кога со Град Скопје раководеше тогашната власт на СДС, првата терестрична дезинсекција против комарци започнала дури на 3 јули и траела до 7 јули, додека првото авионско прскање било организирано на 7 и 8 јули. Практично, првите сериозни активности започнале длабоко во летната сезона. Во 2026 година, пак, активностите започнаа уште на 7 мај“, истакна тој.
Според објавената хронологија, оваа година се спроведени бројни авионски и теренски дезинсекции против ларви и комарци во мај, јуни, јули и август (на 7 мај, 1 и 2 јуни, 11 јуни, 18 и 20 јуни, 26 јуни, 27 и 28 јуни, 10 јули, 13 и 15 јули, 23 јули, 30 и 31 јули, 4 и 6 август, 11 август и 18 август), а закажани се и нови третмани за четврток, петок и во деновите од недела до среда.
„Сите активности се спроведуваат согласно годишната програма, законските обврски и елаборатот на Центарот за јавно здравје – Скопје, како и препораките од Министерството за здравство и европската регулатива. Тоа се фактите. Јавното здравје не се штити со прес-конференции. Не се штити со создавање страв. Не се штити со политички сензации. Се штити со системска работа, континуирана превенција, стручни препораки и навремени активности на терен“, порача Ѓорѓиевски.
Тој упати апел за одговорност до политичките субјекти и нагласи дека третманите ќе продолжат според утврдената динамика.
„Затоа, наместо натпревар во тоа кој ќе произведе поголема паника, очекувам од сите политички субјекти минимум одговорност кога зборуваат за здравјето на луѓето. И навистина ме зачудува недостатокот на образ кај луѓе кои под неразјаснети околности се нашле во политиката. Град Скопје ќе продолжи со третманите согласно стручните препораки и утврдената динамика, а јавноста ќе биде навремено информирана за секоја наредна активност. А СДС, најверојатно ќе продолжи од секоја трагедија да се обидува да собере ситни поени бидејќи на друг начин не можат да бидат актуелни. Здравјето на скопјани е премногу сериозна работа за да биде средство за дневнополитички поени. А за Филипче воопшто да не се грижите, јахтата на Заев најверојатно е побрза од комарците и тој е безбеден“, заклучи тој.