Нов фудбалски стадион, реконструкција на Спортскиот центар „Шуто Оризари“, изградба на нов Културен дом „Есма Реџепова“ и спроведување на социјалната програма „Скопје – град кој се грижи за сите“ се низа инфраструктурни и социјални проекти за Шуто Оризари кои денеска ги најави кандидатот за градоначалник на Град Скопје од ВМРО-ДПМНЕ, Орце Ѓорѓиевски.
Според него, овие вложувања се дел од визијата за рамномерен развој на Скопје, каде секоја општина добива шанса да придонесе кон заедничкиот напредок.
-Шуто Оризари е дел од нашата визија за современо и функционално Скопје, каде секоја општина добива шанса да го развие својот потенцијал, изјави Ѓорѓиевски.
Меѓу најавените проекти се изградба на нов фудбалски стадион со трибини, соблекувални, осветлување и пристапна инфраструктура, кој ќе служи за спортски активности на младите, но и за локални и регионални натпревари и општествени настани.
Планирана е и целосна реконструкција на Спортскиот центар „Шуто Оризари“, со нови терени, зелени површини и урбана опрема, со цел да се врати неговата улога како центар на спортот и рекреацијата.
Во областа на културата, Ѓорѓиевски најави изградба на нов Културен дом „Есма Реџепова“ на местото на старото матично, кој ќе биде простор за театар, концерти, изложби, кино и младински активности.
-Со изградбата на новиот Културен дом „Есма Реџепова“ на местото на старото матично, вложуваме во културата како темел на заедништвото и локалниот идентитет. Домот ќе биде простор за театар, концерти, изложби, кино проекции и младински активности, но и симбол на достоинството, традицијата и културната енергија на Шуто Оризари. Со тоа оддаваме и посебна почит кон големата Есма Реџепова – амбасадор на ромската култура, која со својот глас го претставуваше не само Шуто Оризари, туку и Скопје и цела Македонија во светот, истакна Ѓорѓиевски.
Во рамки на социјалната програма „Скопје – град кој се грижи за сите“, најави системска поддршка за граѓаните во социјален ризик, преку финансиска помош, хуманитарни пакети, психосоцијална поддршка и програми за преквалификација. Ќе се формираат и прифатни центри со 24-часовна грижа и програми за ресоцијализација на бездомници.