Градоначалникот на Град Скопје, Орце Ѓорѓиевски, на свечениот настан посветен на титулата „Скопје – Европска престолнина на културата 2028“, порача дека културата мора да прерасне во суштински двигател на урбаната трансформација. Според Ѓорѓиевски, оваа титула не смее да се сведе само на организација на настани, туку треба да послужи како основа за траен развој на градот.
Тој ја нагласи потребата културата да се третира како јавна инфраструктура, а не како декоративен елемент.
„Што навистина значи Скопје да биде Европска престолнина на културата? Дали тоа значи само една година исполнета со настани? Или, како што значи за мене, нешто многу подлабоко – можност културата да стане трајна трансформација, јавна трансформација на инфраструктурата на градот, двигател на урбаниот развој, средство за социјална кохезија, извор на нова економија и основа на нов урбан идентитет“, истакна Ѓорѓиевски.
Градоначалникот додаде дека суштината на еден „добар град“ не лежи само во бројот на манифестации, туку во квалитетот на живеење.
„Добар град не е само град со настани. Добар град е град во кој човек сака пред сè да остане. Град во кој јавните простори се безбедни, зелени, достапни и креативни. Град во кој културата не е луксуз, туку дел од неговото секојдневие“, порача Ѓорѓиевски, нагласувајќи дека титулата треба да донесе трајна промена во управувањето со градот.