Скопскиот градоначалник Орце Ѓорѓиевски ги отфрли тврдењата кои се раширија во јавноста за наводно присуство на бактерии во скопскиот водовод, нагласувајќи дека водата во главниот град е целосно безбедна за пиење.
Според него, станува збор за организирано ширење на дезинформации кои имаат за цел да предизвикаат непотребна паника и вознемиреност кај граѓаните.
Ѓорѓиевски најави соодветни постапки и одговорност за оние кои ја шират хистеријата, додавајќи дека позадината може да биде поврзана и со обиди за политички поени на одредени структури.
Како директен демант на гласините, градоначалникот пред присутните новинари испи чаша вода од скопскиот водовод за да покаже дека нема простор за страв.
Според презентираните информации, сите редовни лабораториски анализи што ги спроведуваат надлежните служби потврдуваат дека водата за пиење во Скопје ги исполнува сите безбедносни стандарди.