Просторот покрај реката Вардар во општина Сарај, на патот кон селото Рашче, кој до неодамна служеше како дива депонија, целосно се чисти и се подготвува за изградба на нов современ парк.
Локацијата денеска ја посетија градоначалникот на Град Скопје, Орце Ѓорѓиевски, заедно со градоначалникот на општина Сарај, Мухамед Елмази, и министерот за животна средина, Мухамед Хоџа.
Како што беше посочено при увидот, запуштениот простор ќе биде комплетно ревитализиран и хортикултурно уреден за потребите на локалното население.
„Денес, заедно со градоначалникот на општина Сарај, Мухамед Елмази и министерот за животна средина Мухамед Хоџа, го посетивме просторот покрај реката Вардар, на патот кон селото Рашче, место кое до вчера беше дива депонија, а денес веќе се чисти и се подготвува да добие сосема нов лик. Овој запуштен простор ќе прерасне во голем, модерен и уреден парк, со хортикултурно и партерно уредување, зелени површини и содржини за рекреација, одмор и дружење на жителите од овој дел на Сарај“, истакна Ѓорѓиевски.
Паралелно со оваа активност, најавена е и обнова на постојниот мега-парк во оваа општина, кој долги години беше надвор од приоритетите за одржување.
„Истот така, наскоро започнуваме и реконструкција на мега-паркот во Сарај, кој децении е оставен во негрижа. Ова место има природна убавина, има потенцијал и заслужува грижа. Не заслужува отпад, запуштеност и заборав, туку живот, зеленило и простор во кој граѓаните ќе уживаат“, се наведува во објавата.
Ѓорѓиевски потенцираше дека заложбите за рамномерен развој на сите скопски општини и понатаму остануваат главен фокус на локалните власти.
„Вложуваме во секој дел од Скопје, затоа што сите наши сограѓани заслужуваат еднакви услови, уредена околина и подобар квалитет на живот. Како што ветив, продолжуваме со изградба на паркови, зелени површини и јавни простори кои му даваат нова вредност на градот. Скопје го менуваме со дела. А на сите нас останува обврската да го чуваме секој уреден простор како свој дом“, порача Ѓорѓиевски.