Експерти од Хесен Форст – Државната шумарска служба од Хесен, Германија, Научно-истражувачкиот институт за шумарство од Гетинген, Германија, како и од Факултетот за шумарски науки, пејзажна архитектура и екоинженеринг „Ханс Ем“ при Универзитетот „Св. Кирил и Методиј“ во Скопје, остварија работна посета на ЈУ Национален парк „Пелистер“.
Како што истакна директорот на установата, Иванчо Тошевски, експертите од Гетинген доаѓаат од истата институција во која порано работел германскиот ботаничар Аугуст Гризебах, кој во 1839 година прв ја открил моликата на Пелистер.
Тошевски посочи дека викенд посетата била во функција на зајакнување на соработката и зачувување на шумските генетски ресурси, како и идентификација на соодветни семенски насади и одржливо обезбедување шумски репродуктивен материјал од молика, македонска ела, дабови и други видови од Македонија.
Во текот на посетата биле разгледани насадите од молика и македонска ела во Националниот парк „Пелистер“, а претставниците од институциите размениле искуства за мерките за конзервација на шумските генетски ресурси, одгледувачките практики и користењето на репродуктивен материјал од овие видови.
Од ЈУ Национален парк „Пелистер“ очекуваат соработката со германските институции да се продлабочи, со можност паркот да стане партнер во идни идни проекти за конзервација, како и за размена на посети со заштитени подрачја во Хесен, Германија.