Горан Герасимовски, градоначалник на Општина Центар и кандидат за нов мандат, денеска оствари средба со универзитетската професорка Татјана Стојаноска Иванова, на која разговараа за проблемот со вандализмот и деструктивното однесување кај младите, како и за иницијативата во која се бараат измени во повеќе закони од областа на родителството, детската и малолетничката заштита и образованието.
„Имавме неколку инциденти на игралиштето во Капиштец кои беа снимени, а неодамна беше вандализирана и новата теретана во Паркот на Франкофонија. Затоа ја покренавме оваа иницијатива, ја доставивме до ЗЕЛС, ги активиравме сите институции и бараме законски измени кои ќе овозможат поефикасно справување со ваквите случаи. Предлогот ни е воведување општествено корисна работа за младите прекршители и нивните родители, со цел да се подигне јавната свест, да се поттикне одговорноста и да се спречи повторување на вакви појави,“ изјави Герасимовски.
Тој потсети дека Општина Центар веќе спроведува активности насочени кон психолошка поддршка и здрав развој на децата.
„Први воведовме забрана за користење мобилни телефони за време на наставата, а класниот час секогаш е резервиран за разговор со учениците. Социјалните мрежи можат да бидат заводливи и токсични за младите, со содржини кои се невистинити и опасни. Затоа предложивме овие часови да бидат посветени на искрен разговор со наставникот и соучениците, со емпатија и разбирање. Само преку пренесување на вистинските морални вредности, го градиме моралниот кодекс кој ќе придонесе за правилен развој на нашите деца и за тоа како да бидат подобри граѓани на заедницата и општеството во кое живееме. Нешта што денес се поважни од кога било,“ додаде градоначалникот.
Во рамки на средбата, Герасимовски и професорката Стојаноска Иванова се согласија дека појавата на вандализмот бара поширока мобилизација, стратегија и вклученост не само на институциите, туку и на родителите и наставниците.
Општина Центар во изминатиот период ги реконструираше сите детски игралишта и постави нова теретана во Паркот на франкофонија, која неодамна исто така беше мета на вандализам.