Градоначалникот на општина Центар, Горан Герасимовски, најави нов пакет мерки насочени кон подобрување на стандардот на учениците и унапредување на образовниот процес во општината. Меѓу клучните одлуки е зголемувањето на месечните стипендии за талентираните ученици и спортисти, како и за оние кои доаѓаат од социјално ранливи категории.
„Донесовме одлука за зголемување на стипендиите за талентираните ученици во областа на науката, техниката и посебните вештини, како и за спортските стипендии, за 1.000 денари. Водејќи се од принципот на еднакви можности, стипендиите за учениците што доаѓаат од семејства во социјален ризик ги зголемуваме за 1.500 денари“, изјави Герасимовски.
Покрај финансиската поддршка, од септември се воведува бесплатен и здрав оброк за сите ученици во целодневна настава. Дополнително, повозрасните ученици ќе добијат бесплатна екскурзија преку проектот „Сакај ја Македонија“.
Општината планира и капитални инвестиции во спортската инфраструктура. Оваа година ќе започне изградбата и реконструкцијата на два затворени базени во основните училишта „11 Октомври“ и „Димитар Миладинов“.