Генералниот секретар на СДСМ, Александар Саша Димитријевиќ, на денешната прес-конференција предупреди на нова еколошка опасност во заштитеното подрачје околу изворот Рашче, од каде со вода за пиење се снабдува главниот град.
Според СДСМ, околината на изворот, кој обезбедува вода за Скопје и за 25 проценти од населението во државата, е затрупана со отпад и претворена во дива депонија.
„Нова закана за чиста вода за пиење се случува овде во заштитеното еколошко подрачје на Рашче, и тоа пред очите на власта на Мицкоски“, изјави Димитријевиќ.
Тој посочи дека сликата на теренот е алармантна и дека состојбата претставува директен ризик за здравјето на граѓаните, особено поради тоа што во истото подрачје се произведуваат и земјоделски производи.
„За оваа катастрофа, не му треба на ВМРО и градоначалникот Орце Ѓорѓиевски дрон – еве каква е состојбата… катастрофа! Тотален хаос“, додаде генералниот секретар на СДСМ.
Од опозициската партија потенцираа дека повеќе од еден месец граѓаните во Гостивар и во над 50 населени места ширум земјата се соочуваат со проблемот на загадена вода за пиење, а за тоа сè уште никој не понел одговорност.
„Кој го дозволува овој еколошки геноцид? Кој дозволил ваква дива депонија да се создава во близина на изворот од кој се снабдува една четвртина од граѓаните во државата? Кој ќе одговара за овој ризик од загрозување на здравјето и животите на граѓаните?“, праша Димитријевиќ.
Тој повика на итна реакција на институциите, истакнувајќи дека правото на чиста и безбедна вода мора да биде загарантирано за сите.
„Граѓаните имаат право на чиста и безбедна вода. Не може цела Македонија да биде заложник на неспособноста и неодговорноста на ВМРО. Водата не е партиска тема. Водата е живот“, порача Димитријевиќ.