Претседателот на Собранието, Африм Гаши, денеска и утре ќе престојува во официјална посета на Грузија, на покана на претседателот на Парламентот на Грузија, Шалва Папуашвили.
Во состав на собраниската делегација, предводена од Гаши, се и пратеничките Дафина Стојаноска, Бисера Костадиновска-Стојчевска и Мимоза Муса, членки на Пратеничката група за соработка со Грузија, како и заменик-генералниот секретар на Собранието, Ибуш Јусуфи.
Според собраниската прес-служба, за време на посетата Гаши ќе оствари средби со претседателот на Парламентот на Грузија, Шалва Папуашвили, со претседателот на државата, Микеил Кавелашвили, како и со премиерот Иракли Кобахидзе.
Во рамки на посетата, претседателот на Собранието ќе учествува и на пролетната сесија на 67. Генерално собрание на Парламентарното собрание на Црноморската економска соработка (ПАБСЕК), каде што ќе има и свое обраќање.