Претседателот на Собранието на Република Северна Македонија, Африм Гаши, учествуваше како главен говорник на Втората меѓународна конференција за борба против дискриминацијата, која се одржа во Каиро.
Конференцијата беше организирана од страна на Генералниот секретаријат на Лигата на арапските држави, во соработка со Исламската светска образовна, научна и културна организација (ICESCO).
На меѓународниот настан учествуваа претставници на парламенти и влади, меѓународни организации, академици и верски лидери.
Фокусот на дискусиите беше ставен врз улогата на муслиманските заедници на Запад, промовирањето на толеранцијата, меѓурелигискиот дијалог, заштитата на човековите права, борбата против говорот на омраза и градењето култура на мир.
Во своето обраќање пред присутните, претседателот на Собранието ја истакна заложбата на земјава за зачувување на различностите.
„Република Северна Македонија претставува пример за меѓурелигиски и мултиетнички соживот. Различноста е богатство и темел за градење демократски општества“, порача Гаши.
Тој дополнително посочи дека борбата против секоја форма на дискриминација не претставува само заштита на една заедница, туку и заштита на човечкото достоинство, еднаквоста, слободата на совеста и почитувањето на различностите.
Во однос на системската поддршка, спикерот Гаши ја нагласи клучната улога на парламентите и институциите во зајакнувањето на дијалогот, заштитата на основните права и промовирањето на културата на меѓусебно почитување.