Претседателот на Собранието Африм Гаши изјави дека не очекува предвремени парламентарни избори и дека, според него, тие нема да се одржат.
„Според мене, предвремени избори не треба да има и убеден сум дека нема да има“, рече Гаши пред новинарите.
Во однос на новиот Изборен законик, тој оцени дека е добро да биде донесен без оглед на тоа кога ќе се одржат следните избори, но посочи дека работната група која треба да работи на измените во моментов е заглавена и нема конкретен термин за нов состанок.
На денешната координација во Собранието било разговарано и за отсуството на министри од седниците за пратенички прашања, поради што од Владата било побарано да го разгледа проблемот и да не се повторува ваквата практика.
Гаши најави дека поради патувањето на премиерот на Генералното собрание на Обединетите нации на крајот на септември, можно е следната седница за пратенички прашања да биде презакажана за термин по неговото враќање од Њујорк.