Претседателот на Собранието, Африм Гаши, денеска упати официјална честитка по повод 23 Мај – Меѓународен ден на Власите.
Во своето празнично обраќање, собранискиот спикер нагласи дека влашката заедница отсекогаш имала значајно место во државата.
Гаши потенцираше дека овој ден е важна можност за дополнително афирмирање на соживотот, почитта и зачувувањето на идентитетот.
„По повод Денот на Власите, во име на Собранието на Република Северна Македонија и во мое лично име, упатувам најискрени честитки до сите припадници на влашката заедница. Овој ден претставува посебна можност за афирмирање на вредностите на соживотот, меѓусебното почитување и зачувувањето на културниот и јазичниот идентитет на сите заедници. Влашката заедница била и останува важен дел од културниот мозаик на нашата држава“, истакна Гаши.
Тој дополнително додаде дека законодавниот дом во континуитет останува фокусиран на заштитата и унапредувањето на правата на сите етнички групи.
„Собранието останува посветено на унапредувањето на правата на сите етнички заедници, во духот на еднаквост, толеранција и почитување на различностите. Честит Ден на Власите!“, се наведува на крајот од честитката на претседателот на Парламентот.