Претседателот на Собранието, Африм Гаши, денеска оствари средба со европратениците кои учествуваат на 25. состанок на Мешовитиот парламентарен комитет (МПК) Северна Македонија – Европска Унија, кој на 24 и 25 септември 2026 година се одржува во Собранието на Република Северна Македонија.
Во отсуство на хрватскиот европратеник Карло Реслер, кој заедно со македонската пратеничка Иванка Василевска е копретседавач со МПК Северна Македонија – Европска Унија, Делегацијата од Европскиот парламент ја предводеше бугарскиот европратеник Ивајло Валчев, втор копретседавач од страната на ЕУ. Во делегацијата е и Томас Вајц, известител за земјава во ЕП, додека Реслер се очекува да пристигне на почетокот на самиот состанок.
На средбата европратениците пројавија интерес за Собранието во врска со транспарентноста, соработката со граѓанскиот сектор и отвореноста за граѓаните, при што беше истакнато дека невладиниот сектор дава позитивна оценка за работата во оваа насока.
Претседателот Гаши нагласи дека последниве години, со поддршка на нашите меѓународни пријатели, е направен значаен исчекор во делот на транспарентноста и отвореноста на Собранието.
На состанокот се разговараше за реформската агенда, особено за администрацијата, правниот систем и регионалната и транспортната поврзаност. Притоа, единствен беше ставот дека мора заеднички да се работи на јакнење на довербата кај граѓаните, што е клучмо за евроинтегративниот пат.
Гаши посака успешна работа на МПК и изрази уверување дека низ конструктивен дијалог може да се надминат сите предизвици.