Опозициската АКТ денеска излезе со нови тврдења за тендерски скандали, во кои обвинува дека омилените изведувачи на власта во десетици општини низ државата работат по ист образец, користејќи ги услугите на само две фирми за проектирање и стручен надзор – „МГ Проект“ и „МБМ Архитекти“.
Членот на Извршниот одбор на АКТ, Јон Фрчкоски, на прес-конференција посочи дека претходно објавените три фирми-изведувачи „Ленди Груп“ (17,6 милиони евра), „Пирамид билдинг солушнс“ (16 милиони евра) и „Масев ДООЕЛ“ (18 милиони евра), се директно поврзани во бизнис-шема со парите од унгарскиот кредит.
Според АКТ, во општина Кисела Вода и во општина Илинден, каде изведувач е „Ленди Груп“, стручниот надзор го врши исклучиво „МГ Проект“. Од друга страна, во Аеродром и Гази Баба, каде главен изведувач е „Пирамид билдинг“, договорите за надзор над патиштата и објектите ги добива „МБМ Архитекти“. Фрчкоски додаде дека компанијата „Мастеф“, која работи со урбана опрема, исто така функционира само под надзор на овие две фирми.
„Овие две фирми имаат подолга историја на работење во Македонија со проектирање и надзор, но никогаш претходно во вака структурирана шема поврзана со парите од унгарскиот кредит. Тоа го потврдуваат и бројките за профитот и склучените договори само во изминатите две години. Па така, МГ Проект во овој период успева да склучи договори со вкупна вредност од 2,4 милиони евра, а МБМ Архитекти за овој период успева да склучи договори вредни 2,9 милиони евра! Во проценти, ако пресметаме, од 2024 година имаат раст од неверојатни 288,65%“, изјави Фрчкоски.
Тој јавно запраша до кога ќе молчи Јавното обвинителство за енормниот раст на профитите на овие две фирми и најави дека СДСМ ќе побара одговорност и детален преглед за сите тендерски постапки.