Франција од оваа учебна година воведува забрана за користење мобилни телефони и во средните училишта, како дел од пошироките мерки за ограничување на времето што децата и младите го поминуваат пред екрани.
Францускиот претседател Емануел Макрон порача дека заштитата на децата од ризиците поврзани со прекумерната употреба на екрани повеќе не може да се одложува.
„Училиште без телефони значи враќање на мирот неопходен за учење“, напиша Макрон на платформата X.
Новата мерка се надоврзува на забраната што од 2018 година веќе важи во основните и пониските средни училишта во Франција.
Министерот за образование Едуар Жефре изјави дека примената на забраната ќе може да се приспособува на локалните услови и специфичностите на секое училиште.
Сепак, дел од директорите предупредуваат дека училиштата не се целосно подготвени за новите правила. Од синдикатот SNPDEN-UNSA посочуваат дека роковите за воведување на мерката биле кратки и дека многу училишта не успеале навреме да ги променат интерните правилници.
Францускиот парламент ја усвои мерката кон крајот на јули, а училиштата претходно добиле упатства како да се подготват за нејзино спроведување. За целосна примена ќе треба да ги изменат своите правилници по консултации со ученичките и училишните тела.