По вчерашните пријави за измами со сообраќајни прекршоци, денеска граѓаните масовно добиваат нови лажни СМС пораки, овојпат за наводни неплатени казни кои мора веднаш да се подмират. Измамниците користат линкови кои водат до лажни веб-страници, со цел да ги извлечат податоците од банкарските картички на корисниците.
Нападите се организирани преку пораки кои на прв поглед изгледаат официјално, честопати имитирајќи државни институции или поштенски служби. Во нив се тврди дека доколку казната не се плати во најкраток рок, ќе следуваат дополнителни трошоци или казнени мерки.
Од МВР и надлежните служби апелираат на исклучително внимание и советуваат граѓаните да не отвораат сомнителни линкови пристигнати преку пораки. Официјалните институции никогаш не бараат плаќање на казни преку СМС со директен линк за внесување на податоци од картичка.
„Секогаш проверувајте ја официјалната веб-адреса на институцијата и не ги споделувајте вашите лични податоци и кодови од картичките на сомнителни платформи“, предупредуваат експертите за сајбер безбедност.
