Стравична сообраќајна несреќа вчеранаутро ја потресе Мачва. Во тешката сообраќајка, која околу 6:20 часот се случила во местото Слатина, на територијата на Шабац, едно лице го загубило животот на местото на несреќата, додека две лица со тешки повреди итно биле пренесени во болница.
Според податоците на српските медиуми, жртвата на несреќата е младиот српски пејач Горан Максимовиќ, препознатливо лице на народната, крајишката и традиционалната музика. Тој се реализирал и како автор. Негов препознатлив белег беше песната „Namigni de garavušo“, за која тој ја компонираше музиката, додека текстот го напиша покојниот Лазо Пајчин.
Горан Максимовиќ – Приватна Архива
Според информациите на српските медиуми, сообраќајната несреќа се случила околу 5:45 часот на улицата „Церска“. Автомобилот, управуван од 44-годишниот М.И., се движел во правец од Шабац кон Волујац, кога од засега непознати причини излетал од коловозот.
Возилото завршило во одводен канал, а со предниот дел удрило во земјен пропуст. На задното седиште се наоѓал Горан Максимовиќ, кој се здобил со тешки повреди и починал на местото на несреќата.
Возачот М.И. и двајцата сопатници, М.И. и М.С., исто така се здобиле со тешки телесни повреди. Тие се пренесени и хоспитализирани во Здравствениот центар во Шабац.
Противпожарно-спасувачката единица од Шабац пристигнала само 12 минути по пријавата, со четворица пожарникари-спасители и специјално возило. Спасувачите веднаш почнале да го сечат автомобилот со хидраулична опрема за да ги извлечат преостанатите две лица.
Максимовиќ само неколку часа пред несреќата настапувал со својот „Тика Така бенд“ на Шабачкиот вашар. Според сведоштва на негови блиски, атмосферата била одлична, а со него биле и пријатели и неговата сопруга, која исто така била во автомобилот за време на несреќата.