Познатата ирска актерка Слејн Кели, која публиката најмногу ја сакаше по улогата во популарната телевизиска серија „Тјудори“, почина на 44-годишна возраст по тешка борба со болест.
Актерката, родена во 1982 година во Даблин, починала во саботата, мирно во својот дом, опкружена со оние кои најмногу ја сакале – нејзиното семејство. Нејзиниот близок пријател Педи Кортни се огласи на социјалните мрежи по повод трагичната загуба, откривајќи ја причината за смртта со потресни зборови: „Ракот ѝ го одзеде животот“.
Слејн зад себе остави неутешно семејство – родителите Мерион и Џо, братот Дара, снаата Мегс и внуката Елиза. Особено потресна е веста дека зад себе го оставила и нејзиниот 11-годишен син Нокс, нејзиното единствено дете.
Многумина ќе ја паметат по извонредната улога на Џејн Хауард во серијата на Би-Би-Си „Тјудори“, каде што глумеше заедно со познатиот актер Џонатан Рис Мајерс. Таа беше препознатливо лице и од рекламата за чај на компанијата „Barry’s Tea“.
Покрај актерскиот талент, Слејн се реализираше и како филмска продуцентка. Работеше на реализацијата на романтичниот филм „The O’Brien’s“ од 2013 година, во кој истовремено имаше и една од главните улоги.
Сепак, нејзиниот живот не бил поврзан само со светот на филмот. Слејн имала големо срце и огромна љубов кон животните, што ја поттикнало да ја основа градската фарма „St Anne’s City Farm“. Оваа заедничка фарма, која и денес функционира како работен и едукативен центар, останува како траен спомен на нејзината хуманитарна работа и благороден дух.
Во официјалното соопштение за смртта, со кое семејството се прости од саканата ќерка, мајка и сестра, било наведено дека Слејн неизмерно ќе им недостасува на сите кои ја познавале и ја сакале, а дека засекогаш ќе остане запаметена по својата работа и својот дух.