Денеска остварив работна средба со холандските амбасадори во земјите од Југоисточна Европа, кои престојуваат во Скопје во рамките на регионална амбасадорска конференција. Ова го напиша министерот за надворешни, Тимчо Муцунски, на Фејсбук.
-Разговаравме за билатералните односи, европската интеграција и спроведувањето на реформската агенда. Изразив благодарност за континуираната поддршка од Холандија за пристапен процес заснован на заслуги, со владеењето на правото како клучен елемент на реформите, напиша тој.
Истакна дека посебен акцент се ставен на документот на Европската комисија за иднината на проширувањето и внатрешните реформи на Европската Унија, како и на претстојната стратешка дискусија во Европскиот совет.
-Разменивме мислења и за актуелните состојби во регионот, неговата безбедност, стабилност и просперитет, како и за глобалните безбедносни предизвици и потребата од натамошно зајакнување на соработката и заштитата на заедничките стратешки интереси, напиша Муцунски.
Инаку, министерот вчера се сретна со бугарската министерка за надворешни работи Велислава Петрова Чамова, во Софија.
По средбата, Муцунски оцени дека разговорите поминале во конструктивна атмосфера, но нагласи дека разликите во ставовите за клучните прашања остануваат значителни. Двете страни се договориле да го продолжат дијалогот за прашањата од заеднички интерес.
Средбата меѓу шефовите на дипломатиите на Македонија и Бугарија привлече внимание и кај бугарските медиуми, кои во извештаите ги истакнуваат разликите околу европската интеграција на Македонија, барањето за временска рамка за исполнување на преземените обврски и потребата од продолжување на дијалогот.
БГНЕС: „Муцунски по средбата со Петрова: Ставовите со Бугарија остануваат многу далечни, но дијалогот ќе продолжи“.
БТА: „Бугарија нема други очекувања од Северна Македонија освен исполнување на обврските“.
„24 часа“: „Велислава Петрова: Доверба со Северна Македонија може да има ако се направат уставните измени“.
„24 часа“: „Велислава Петрова го отвора прашањето за Ива Михајлова пред Тимчо Муцунски во Софија“.