Жртва на страшната сообраќајка која вчера го потресе Шабац, но и цел регион, кога околу 5:45 часот на улицата „Церска“, автомобил излетал од патот, е младиот српски пејач Горан Максимовиќ, препознатливо лице на народната, крајишката и традиционалната музика.
26-годишниот Горан само неколку часа пред несреќата бил на познатиот Шабачки панаѓур, каде што се забавувал со сопругата и пријателите, а снимки и фотографии од дружбата објавил на Инстаграм.
ФОТО: Горан Максимовиќ, приватна архива – Последна објава
За српските медиуми се огласи и неговиот најблизок соработник и член на бендот, хармоникашот Никола, кој во тотален шок изјави: – „Ништо не знам, во шок сум. Не знам каде му е сопругата, беа четири лица во автомобилот, мислам дека сите сега се во болница…“
Според информациите на српските медиуми, сообраќајната несреќа се случила околу 5:45 часот на улицата „Церска“. Автомобилот, управуван од 44-годишниот М.И., се движел во правец од Шабац кон Волујац, кога од засега непознати причини излетал од коловозот.
Возилото завршило во одводен канал, а со предниот дел удрило во земјен пропуст. На задното седиште се наоѓал Горан Максимовиќ, кој се здобил со тешки повреди и починал на местото на несреќата.
Возачот М.И. и двајцата сопатници, М.И. и М.С., исто така се здобиле со тешки телесни повреди. Тие се пренесени и хоспитализирани во Здравствениот центар во Шабац.
Противпожарно-спасувачката единица од Шабац пристигнала само 12 минути по пријавата, со четворица пожарникари-спасители и специјално возило. Спасувачите веднаш почнале да го сечат автомобилот со хидраулична опрема за да ги извлечат преостанатите две лица.