Во општина Бутел започна изградбата на нов мега-парк кој ќе се простира на површина од 8.000 квадратни метри. Просторот кој со години беше запуштен долж булеварот „Христијан Тодоровски Карпош“ ќе биде претворен во модерен зелен парк со бројни содржини за сите возрасти.
Паркот ќе вклучува големи зелени површини, пешачки и велосипедски патеки, детски игралишта и фитнес-зони на отворено. Ќе има и простор за одмор и дружење, со урбана опрема и осветлување, со што ќе стане место каде што жителите на општината ќе можат да се релаксираат и активно да го поминуваат слободното време.
Проектот е дел од пошироката иницијатива на Град Скопје за создавање четири мега-паркови и повеќе од педесет нови зелени зони во различни општини. Целта е да се подобри квалитетот на животот и да се зголеми бројот на јавни простори достапни за сите граѓани. Новиот парк во Бутел се очекува да стане едно од омилените места за семејства и млади во овој дел од градот.
