Скопскиот градоначалник преку Фејсбук објава информираше дека преку 220 фонтани за пиење вода се ставени во функција низ Скопје.
-Скопје мора да биде град кој мисли на своите граѓани, особено во летниот период, кога високите температури бараат основни услови за разладување, движење и нормално функционирање.
Со години, поради неажурност, ситни дефекти и негрижа, голем дел од фонтаните за пиење вода низ градот беа оставени надвор од функција.
Она што требаше да биде секојдневна услуга за граѓаните, беше претворено во уште еден заборавен проблем.
Тоа, го менуваме.
Во координација со ЈП „Водовод и канализација“, ги мапиравме, сервисиравме и ставивме во функција повеќе од 220 фонтани за пиење вода, засега.
Ова значи свежа вода за децата, за повозрасните граѓани, за спортистите, велосипедистите, рекреативците, работниците, туристите и за сите кои секојдневно се движат низ Скопје.
Свесни сме дека потребите се уште поголеми.
Затоа, паралелно работиме и на поставување нови фонтани на повеќе фреквентни локации низ градот.
Ова е враќање на редот, грижата и функционалноста во градот.
Скопје мора да биде чист, уреден, достапен и хуман град.
Продолжуваме со работа до секој детал, за секој граѓанин, напиша Орце Ѓорѓиевски.