Вчерашниот ден, 15 јули, беше прогласен за ден на жалост во Ниш, по страшната несреќа кога минибус со срспки туристи, на 12 јули излета и се преврте на магистралниот пат Котор–Никшиќ, во местото Липци, Црна Гора.
Девојката која загина во тешката сообраќајна несреќа во Црна Гора, во која 16 лица беа повредени, е 21-годишната Јована Станковиќ од нишкото село Вртиште. Нејзиното тело вчера беше донесено во Ниш, а ќе биде погребана денеска.
Веста за нејзината смрт длабоко ги потресе жителите на ова нишко село.
– Јована заврши средно училиште „12 февруари“ во Ниш. Потоа се вработи во една обложувалница во градот. Беше во долга врска, а најавуваа и свршувачка. На море замина со помладата сестра. Требаше сега да се вратат дома, но ги снајде трагична судбина – раскажал еден жител на Вртиште.
Соселаните велат дека особено ги погодиле околностите под кои се случила трагедијата.
– Каква е тоа правда? Веројатно се помолила, запалила свеќа, не знаејќи што ја чека. Судбина ли е, којзнае. Се зборува дека возачот бил уморен. Можеби и работодавачот го натерал да вози во таква состојба, не треба однапред никого да осудуваме. Жалосно е што Јована го плати тоа со својот живот – изјавил сосед на загинатата девојка.
Според податоците на српските медиуми, Јована седела до прозорецот на минубусот, и излетала од стаклото за време на несреќата.
Приватна Архива, Јована Станковиќ
Според првичните информации од истрагата, постои сомнеж дека возачот поради замор и поспаност изгубил контрола над возилото.
Од црногорската полиција информираат дека со минибусот управувал 68-годишен маж од Котор. Возилото најпрво удрило во карпа покрај патот, по што се превртело.
Меѓу повредените има и шест деца. Едно од нив поради сериозноста на повредите било итно транспортирано во Клиничкиот центар во Подгорица, додека останатите се под медицински надзор.
Несреќата се случила околу 13:10 часот, додека групата српски државјани се враќала од поклоничко патување во манастирот Острог.
На местото на несреќата бил извршен увид под раководство на обвинител од Основното државно обвинителство во Котор. Истрагата продолжува со цел да се утврдат сите околности што довеле до трагедијата.