Управата за финансиска полиција поднела кривична пријава до Основното јавно обвинителство Скопје против лице со иницијали С.Г.О.Б., странски државјанин, во својство на сопственик и управител на правно лице, како и против самото правно лице, поради сомнение за сторено кривично дело „Злоупотреба на постапката за јавен повик, доделување на договор за јавна набавка или јавно-приватно партнерство“ по член 275-в од Кривичниот законик.
Како што информираат од Финансиската полиција, пријавениот, во својство на управител на правното лице, свесно и со намера ги повредил прописите поврзани со реализацијата на проектот „Рехабилитација и проширување на канализационата мрежа во Општина Кичево“, за кој во 2023 година бил склучен договор со Министерството за финансии – Сектор за централно финансирање и склучување на договори, во рамки на Секторската оперативна програма за животна средина и климатски акции за ИПА II (2014–2020).
Според соопштението, иако бил обврзан во текот на реализацијата на договорот да обезбеди важечка банкарска гаранција и да достави барање за одобрување на подизведувачи до договорниот орган, пријавениот не постапил согласно обврските. Наместо тоа, тој го прикрил стечајот на азербејџанската банка „Muganbank“, која била издавач на банкарската гаранција, со што не ја открил околноста дека гаранцијата повеќе не е валидна.
Дополнително, како што се наведува, биле ангажирани подизведувачи без претходно одобрение од Министерството за финансии и надзорниот орган, со што биле прекршени договорните обврски и условите за реализација на проектот, поради што договорот подоцна бил раскинат.
Од Финансиската полиција посочуваат дека со овие дејствија е предизвикана штета на буџетот на Република Северна Македонија во износ од 127.425.036 денари, како и штета по основ на загубени ИПА средства во висина од 9.474.132 евра, кои државата ќе треба да ги надомести од сопствени средства.