Проектот за филтер-станицата во рамки на изворот Вруток, која е дел од гостиварскиот водоводен систем, е завршен во 2014 година и по примопредавањето е даден на управување на Јавното комунално претпријатие „Комуналец“ од Гостивар, изјави денеска министерот Муамет Хоџа.
На прес-конференција посветена на состојбата со водоснабдувањето во Гостивар, Хоџа одговараше на новинарски прашања поврзани со проектот реализиран со поддршка на Швајцарската амбасада и мерките преземени по последните случувања со водоводниот систем.
Тој посочи дека проектот бил започнат во 2011 година, а завршен три години подоцна.
„Доколку зборуваме за проектот за филтер-станицата во рамките на изворот Вруток, односно за гостиварскиот водовод, проектот е почнат во 2011 година, а е завршен во 2014 година“, изјави Хоџа.
Според него, по завршувањето бил составен записник за примопредавање, по што објектот бил предаден на стопанисување на ЈКП „Комуналец“.
„За истиот постои записник за примопредавање, по што објектот е предаден на стопанисување на Јавното комунално претпријатие ‘Комуналец’, кое функционира во рамките на Општина Гостивар“, рече министерот.